អង់គ្លេស៖ អ្នកកាន់កាប់ភាគហ៊ុនធំបំផុតរបស់ក្លិបបាល់ទាត់ Everton លោក Farhad Moshiri គាត់មិនដើរចេញពីក្លឹបដែលកំពុងជួបបញ្ហាវិបត្តិនោះទេ បើទោះបីជាមានការតវ៉ាយ៉ាងច្រើនលើសលុបពីអ្នកគាំទ្រដែលអំពាវនាវឱ្យលោកលក់ក្លិបនេះក៏ដោយ។

បច្ចុប្បន្នបុរសអ្នកជំនួញសញ្ជាតិអង់គ្លេស-អ៉ីរ៉ង់រូបនេះ កំពុងសម្លឹងមើលទៅលើការស្វែងរកទុនវិនិយោគពីខាងក្រៅសម្រាប់ការស្ថាបនាកីឡដ្ឋានថ្មីរបស់ក្លិប Everton ដែលនឹងអាចមានសមត្ថភាពផ្ទុកទស្សនិកជនបានចំនួន ៥៣,០០០នាក់។ 

គួរបញ្ជាក់ថា ថ្មីៗនេះក្លិប Everton បានសម្រេចបណ្តេញលោក Frank Lampard ចេញពីតំណែង ក្រោយពេលក្លិបស្ថិតក្នុងស្ថានភាពដុនដាបដោយឈរនៅចំណាត់ថ្នាក់លេខ ១៩ ក្នុងតារាង Premier League ដែលអាចប្រឈមនឹងការកាត់ចេញជាលើកដំបូងបង្អស់ក្នុងរយៈពេល ៦៩ឆ្នាំ។ 

លោក Moshiri បានជះលុយជាបន្តបន្ទាប់ក្រោយពីទិញយកក្លិបកាលពីឆ្នាំ២០១៦ ខណៈរយៈពេល ៣ឆ្នាំចុងក្រោយនេះ ក្លិប Everton បានខាតបង់ទឹកប្រាក់ប្រមាណជា ៤៥៧លានដុល្លារអាមេរិក។ យ៉ាងណាមិញ លោកនៅតែទទួលរងការរិះគន់ពីបញ្ហានៃលទ្ធផលដឹកនាំរបស់ក្លិប ស្របពេល Lampard គឺជាគ្រូបង្វឹកទី៧ ដែលត្រូវបានផ្លាស់ប្តូរក្នុងរយៈពេល ៧ឆ្នាំចុងក្រោយ។ 

លទ្ធផលដុនដាបផ្ទួនៗ នាំឱ្យក្លិប Everton ឈរនៅក្បែរបាតតារាង ស្របពេលដែលក្លិបកំពុងឈរចំណាត់ថ្នាក់លេខ ១៩  ក្រោយឆ្លងកាត់ ២០ប្រកួត មាន១៥ពិន្ទុក្នុងដៃ និងត្រៀមជួបជាមួយក្រុមកំពូលតារាង Arsenal នាថ្ងៃទី០៤ ខែកុម្ភៈខាងមុខនេះ៕